Миний цаг

Дурласан нүд

no_email@coo.mn (gereltuya) — Wed, 02 Dec 2009 18:19:00 +0800

Шохоорхов, сонжив түүнийг
Шоолон инээв, найздаа ярив
Бодоод догдлов, барааг нь хараад улайв
Би яачихав...
Худлыг мянга яриад өөртөө үнэмшив
Хуурамчхан шохоорхол биш гэхээс дотроо эмээв
Чи харин юу ч мэдэхгүй байгаад гунив
Чимээгүйхэн нэг л өдөр ирнэ гэж итгэв
Хайр өмнө нь надад байсан
Хагацал бас байсан
Итгэлээр гэрэлтсэн цаг хугацаа байсан
Ирэх өдрүүд тийм байгаасай

Жич: Уг шүлгийг хайртай дүүдээ тэр залуутайгаа заавал учирч аз жаргалтай амьдраарай гээд зориулж байгаам шүү

Хоосон жаргал

no_email@coo.mn (gereltuya) — Mon, 23 Nov 2009 14:46:00 +0800

Өөртөө зохиосон жаргал минь чинийх

Өглөөнөөс урьтаж ирсэн зүүд ч чинийх

Уйлж суугаа нулимс минь чинийх

Уйгарлаж шаналсан бодол ч чинийх

Надад өөрийн гэх зүйл байгаа эсэхэд эргэлзэнэ

Намайг гэх хүмүүс байгаа үгүйд ч эргэлзэнэ

Бодит байдалд өөрийгөө мэдрэхээс эмээнэ

Бодол санаа төсөөллийнхөө орон зайд амьлахыг л хүснэ

Хэтэрхий халуун байна миний сэтгэл

Хэтэрхий хөшүүн байна миний итгэл

Хэтэрхий уйтгартай байна энэ амьдрал

Хэтэрхий урамгүй байна энэ өдөр...

Тайчигч хулгайч хоёрын....

no_email@coo.mn (gereltuya) — Thu, 19 Nov 2009 12:34:00 +0800

Хүн энэ хорвоод хүн болж төрөөд заавал хийх ёстой гурван зүйл байдаг гэдэг. Мод тарих, үр удмаа үлдээх, бас цаг үеийнхээ түүхээс жаахныг ч гэсэн бичиж үлдээх... Блог бичиж эхлээд нэлээд удчихаж. Энэ орон зайгаас олон олон гайз нөхдөө олж авч, тэднээрээ бахархаж, гоёж явах сайхан байдаг. За ингээд үг олдож үхэр холдох нь... Сэтгэл жигтэйхэн догдолж байна. Анхны номоо хэвлэлтэнд өгөх гээд л тэр шүү дээ, бид. Тайчигч бас хулгайч залуу хамтраад амьдралын үнэ цэнэ, нэг нэгэндээ бас өөртөө итгэх итгэл, гэрэл гэгээний тухай бичлээ. Хэн нэгнийг гаднаас нь хараад дотоод мөн чанарыг нь тэмтэрч чаддаггүй. Гэхдээ өнөөдрийн бидний амьдрач байгаа энэ цаг үед янхан, хулгайч хоёр бол нийгэмд шаарлагдсан новшнууд... Үгүй ээ гэхдээ тэдэнд өөрийн гэсэн үнэт зүйл, итгэл мөрөөдөл, сайн сайхан зүйлс байгаа. Садар самуун, хулгай дээрэм сурталчилсан гэж андуу ойлгохоосоо өмнө зүгээр л сэтгэлээсээ тэдний дотоод ертөнцийг тэмтрээд үзээрэй. Эндүү гишгэсэн ганцхан алхамаасаа болж, эндэж алдаж, адлагдаж яваа ч амьдрал баян урт гэдэгт итгэж өөрсдөө амьдралын сайн сайхны төлөө шунан дурлаж байгаа тэднийг мэдрээрэй хэмээн эрхэм таниас хүсье. Блог гэдэг асар том орон зайгаас олж авсан үнэ цэнэтэй бүхний маань дээж нь энэ номд багтаж байгаа гэдгийг дашрамд хэлье. БЛОГМН-ий маань 4 насны ой удахгүй болно. Тэр баярын өмнө энэ сайтын бичигч гэдэг утгаараа Обод, Гэрэлтуяа нарын сэтгэлийн бэлэг гэж үзэж ч болох юм. Тун удахгүй будаг нь ханхалсан шинэхэн номоо та бүхнийхээ гарт хүргэх болно.

Хүндэтгэсэн: Г.Оюунболд
М.Гэрэлтуяа

Зүүд, тэр залуу, итгэл...

no_email@coo.mn (gereltuya) — Fri, 30 Oct 2009 15:39:00 +0800

Зүүд...

Хар талд улаан бороо орж

Хаа нэгтээгээс сүнснүүд намайг дуудна

Тэнд би жинхэнээсээ дурлана

Тэвэрт минь харин үхдэл хэвтэнэ

Өглөө...

Бүүдийсэн тэнгэрт нар мандаж

Би амьд гэдгээ мэдрэнэ

Яг энд би жинхэнээсээ дурлана

Ягаахан уруул, бүлээхэн гарыг атгахыг хүснэ

Өдөр...

Хүмүүс өдрийн хоолоо идэж

Хөшигний цаана амьдрал хуучнаараа үргэлжилнэ

Би хэн нэгнийг сэтгэлээсээ эрнэ

Бие, сэтгэл, өөрийгөө бүхэлд нь тушаахаар яарна

Үдэш...

Гэрийн зүг ганцаар гуниглангуй алхана

Гэрэлт нар дахиад мандахгүй мэт жаргана

Яг ард минь танил хөлийн чимээ гарна

Янагхан минь би ирлээ гэж хэлнэ

Шөнө...

Би чамайг өдөржин хүлээсэн гэж аргадангуй дуугарна

Бие биедээ уусан хоёул жаргана

Тэр залуу надаас үүрээр явна

Тэвэрт минь харин хуурамч итгэл үлдэнэ

Зүүд...

Хар талд улаан бороо орно

Хатсан цэцэгс хөлийн доор ёолон орилно

Тэр залуу хуурамчхан байсан болохоор

Тэвэртээ үхдэлтэй сэрэх нь жам ч юм шигээ...

Хайртайн байна өө, тэгээд ч хэнийг...

no_email@coo.mn (gereltuya) — Fri, 30 Oct 2009 09:05:00 +0800

Блогоо хаав. Буцаагаад нээв. Өөрөө өөрөөсөө өөрийгөө нуух гэсэн оролдлого амжилтгүй болов. Он цаг урсан өнгөрсөөр нэг л мэдэхэд 1345 хоног энэ орон зайд амьдарчихаж. Гэнэн бодлууд, гоёхон мөрөөдлүүд, итгэл, хайр, инээд хөөр, уй гашуу, уйтгар гуниг, нулимс бас... Олон олон дурсамжууд энэ л талбарт бичигдэн үлдэж... Блог, блог , блог... Яах гэж бичдэг тухай Захирал тун сайхан хүүрнэн өгүүлсэн байна лээ. Эргээд бодлоо. Би яагаад блогоо хаасын бол, яагаад өмнө нь бичээд байсын бол, бичихгүй болохоор яагаад байгаан бол гээд л...
Өчигдөр, уржигдар мессэнжэрээр, мессэжээр, утсаар "Яагаад блогоо хаасын? Хэн чамайг гомдоосын?" гэсэн асуултууд хичнээн ч ирэв. Би хэн нэгэнд гомдоогүй ээ. Зүгээр л хаачихсан байсын. Бичмээр байсан ч уншаад сэтгэгдэл үлдээгээд л яваад байхад болно гэж бодож байв. Харин өнөө өглөө зүгээр л өөрийнхөөрөө өөрийнхөөрөө гээд орилоод байдаг нөхөр миний цаг өнөөдөр яагаад өөрийнхөөрөө байж чадахгүй байгаа тухай бодлоо. Тэгээд л блогоо эргүүлээд нээж байна. Шинэ бичлэг гэдэг цонхыг хараад инээж ч байх шиг... Блогтоо хэтэрхий хайртайн байна, өө.

Блог минь баяртай...

no_email@coo.mn (gereltuya) — Wed, 28 Oct 2009 09:00:00 +0800

Блог минь баяртай...

Хараал идсэн амьдрал чи надаар тохуурхаж л бай

no_email@coo.mn (gereltuya) — Wed, 21 Oct 2009 09:24:00 +0800

Хараал идсэн амьдрал чи надаар тохуурхаж л бай

Хар, цагаан баяр, гунигийг би чамаас авахдаа л авна

Шатрыг өрөг дээрх жаахан хүү шиг харагдлаа ч

Шийтгэл, шагнал, алдаа оноог чинь үүрэхдээ л үүрнэ

Би

Амьдралын жүжгийн гол биш туслах дүр

Ад зэтгэр, бурхан буддад харагддаггүй өчүүхэн хорхой

Намайг энд байгаагийн төлөө хэн ч баярлаагүй

Намайг эндээс явлаа гээд хэн ч бас гунихгүй

Гэхдээ

Өвгөн улиас газраас бат зууран шуурганд тэсдгийг санаарай

Өнөөдөрийнхөөр бүх зүйл мөнхөд үргэлжлэхгүй гэдгийг бодоорой

Би чиний өгсөн болгоныг өөрийнхөөрөө үүрнэ

Битгий тохуурх, хараал идсэн амьдрал...

Чамд захиа бичмээр байна

no_email@coo.mn (gereltuya) — Mon, 19 Oct 2009 15:00:00 +0800

Инээмээр байна харин чи алга

Итгэмээр байна бас л чи алга

Өөрийгөө ойлгомоор байна чи алга

Өрөөлөөс сургийг чинь сонсмооргүй байна хурдан ир

Чамд захиа бичмээр байна үг дутна

Чамтай утсаар ярьмаар байна үг дутна

Чиний гэсэн бүхнийг өөрийн болгомоор байна үг дутна

Чимээгүй өөдөөс чинь хараад суумаар байна хурдан ир

Тэнгэр бүүдийгээд гунигтай шүүрс алдана

Тэртээ холоос чиний сураг хааяахан дуулдана

Өөрөөсөө чамайг хайсаар итгэл алдрах нь ээ

Өмнө чинь сөгдөж гуйхгүй ээ, зүгээр л хүрээд ир...

Дэмжээ дэмжээ явчаарай, манайхаан

no_email@coo.mn (gereltuya) — Fri, 16 Oct 2009 11:48:00 +0800

(Энэ хязгаарлалтын тохиргоотой бичлэг байна. Зөвхөн унших эрхтэй хүмүүс л нэвтэрч блогоос нь унших боломжтой...)

Ингэх л гэж...

no_email@coo.mn (gereltuya) — Thu, 15 Oct 2009 11:36:00 +0800

Догдлох гэж

Дороо эргэлдэн буух цасыг хүлээдэг

Даарах гэж

Дан цамцтай гадаа зогсдог

Инээх гэж

Эмзэгхэн усан ширхэгийг хүлээдэг

Эмзэглэх гэж

Ийм л өдөр чамайг боддог...